أولا .. انا عارفة انى مدونة "بكسر الواو " جديدة والمفروض مسبش مدونتى مدة كبييير كده من غير اجدد فيها بس مش غير ما أقول الكل حاسس بمعناة الطلاب فى هذه الفترة العصيبة من العام الدراسى .. والله حاسة انى بحارب عشان أفضل عايشة فى العالم اللى حواليا وحاسة بيهم لانى لو سبت نفسى مش هعرف أى حاجة فى الدنيا غير بس المناهج واللى بتتكلم عليه والحاجات عديمة الفائدة ديه ..
من ضمن محاولاتى للتعايش مع العالم اللى حواليا ومعرفة أخباره عرفت الخبر السعيد جدااااا على كل العمال فى بر مصر المحروسة وهو زيادة الأجور بنسبة 30% .. انبليفبوووول .. شئ لا يصدق .. ريسنا العظيم انهاردة وهو بيلقى الخبر على العمال كنت حاسة انه بيتبرع بالزيادة من جيبه الخاص .. فيه الخير ..
سرحت شوية فى التفكير وكان نفسى اعرف عمال مصر دول مرتباتهم كام يعنى .. قلت يوم ما عامل يكون معمر فى المهنة بتاعته ما اعتقدش ان مرتبه هيزيد عن 500 جنيه .. يعنى الـ30% دول هيخلوا المرتب بدل 500 هيبقى 630 لا والله بجد حاجة تفرح .. مبرووووك ياعمال مصر .. هتعرفوا تعيشوا مرتاحين ومبسوطين ومرفهين من هنا ورايح .. الأحلى بئة انى فوقت من الحلم ده على برنامج العاشرة مساءا وكانت مستضيفة عامل .. قال انه بقاله 12 سنة شغال ومرتبه الأساسى 250 جنيه ....!!!!!
يعنى حتى حلم الـ 500 جنيه طلع غلط .. 200 جنيه يعنى بعد اكرامية الريس والارتفاع العظيم اللى هتشده المرتبات هيبقى مرتبه 260 ..
لا فعلا حقهم يفرحوا ..
وهنعيش بئة على الارتفاع ده كااااااام سنة .. فيهم هتتضاعف كل الاسعار .. واللى يتكلم هيقولوا زودنالكم المرتب .. ترتفع مصاريف التعليم وبرده محدش يتكلم .. زودنا المرتبات .. اى حاجة تحصل .. زودنا المرتب ..
السنة اللى فاتت كنت بتدرب فى شركة البتروكيماويات المصرية .. شركة بترول حكوميه .. المهندس اللى كان بيدربنى قالنا خطوات الشغل فى الشركة .. أولا مافيش مانع تفضل 7 سنيين بعقد من غير ما تتثبت .. يعنى المهندسين دول بيشوفوا الآمريين والله وبعد كده كمان لما ييجوا يشتغلوا ميتثبتوش .. طيب يعنى بفرض واحد واسطة واتثبت مرتبه هيبقى كام .. لو حابين تتصدموا زى ما اتصدمت هقولكم..
170 جنيه ..دول أقل من مصاريف الكلية .. والله مش عارفة أضحك ولا أعيط .. وحتى فى الشركات الخاصة واحد قريبى بيشتغل مدير فى شركة كبيرة جداا للبترول بيقولى انه اول ما اتعين المفروض انالشركة ديه مرتباتهم بالدولار .. بس طبعا صحاب الشركة أذكى من كده بكتير .. مثلا هو أول ما اتعين اتعين بـ 1000 دولار والدولار كان بـ 3 جنيه .. كانوا بيدوههم المرتبات بالجنيه المصرى .. يعنى الدولار بئة بـ 6 جنيه وهما لسة بياخدوا الـ3000 جنيه هما هماهم .. والله كل البلد مظلومين مش عمال الشركات الحكومية بس .. ومحدش طبعا كان يقدر يتكلم فى الشركة لان ملاكها أمراء عرب من السعودية والكويت وووو ..
فعلا مش لاقية كلام أقوله بعد كل ده أقوله غير "عمار يامصر"
ومبرووووك ياعمال مصر ... وكل سنة وانتم طيبين
هناك 13 تعليقًا:
ههههههههههههههههههه ....كتتتتتتتر الف خيرك يا ريسنا يا فا رسنا يالى هتجيبلنا الكافيه عن قريب ان شاء الله ,,لا بجد تعب نفسه ايه التنازل ده ؟؟بس عالعموم يعنى عشان مبقاش سلبيه الاضرابات والاعتصامات عملت شغل بردو حتى لو بسيط يعنى لو الشعب فاق بجد ووقف مع بعضه اكيد اكيد حقوق العمال والموظفين وكل الشعب هترجع لان مش بس العمال اللى حقوقهم ضايعه ..وربنا معاكم يا شعب مصر
ماحدث بالامس من تصرف جلالة ملك مصر تصرف اقل ما يمكن ان يقال عنه هو تصرف هزلي قميء استفزازي استعباطي !! اذا اعدنا صياغة كلماته المبجلة سنجدها .. ايها المحكومون ان ارزاقكم بيدي وقد قررت زيادتها .. قمة العنجهية والاستعلاء في كلامه .. قرأت في احد اعداد الدستور مقالة عن الديكتاتور وكيف يتحول من انسان عادي الى دكتاتور وكيف ان اول ما يفقده هو تلقائيته ويفقد الأنا العليا بداخله والمسؤولة عن القيم والمثل ..
المشكلة ان ده مش فاهم سياسة ولا قانون !! بنود القانون لا تعطي للرئيس حق المنح او السلب من الشعب .. يعني يعمل مشروع قانون زيادة مجلس الشعب يعتمده ويقره. انما انه يصحى الصبح يفتكر ان الشعب بيموت وبيضرب يقوم مزوده 30% بشكل هزلي سخيف فده قمة انعدام اللاشيء
تدوينة رائعه
ومحدش فاهم حاجه
أمبارح كنت فى مكتب رعاية الشباب فى كليتى..شفت الفرحة بجد على وشوشهم لما عرفوا بالخبر ، لكن بين كل الموظفين كان فى أستاذ أبراهيم ..راجل ذكى وعارف الفولة ، كان بيتعامل مع الموضوع ببسمة سخرية مليانة مرارة.. سمعته بيقول لزميله اللى الفرحة مش سيعاه أن الـ 30 % دول بكرة هيرحوا فى تمن علبة سجاير ولا باكو شاى
الحسنة اللى أداها الزعيم للرعية هترد له أضعاف مضاعفة..واهو كله بيزنس وربنا ما يحرمنا من بنوك سويسرا
والله دى حاجة تحرق الدم...هو انا لية بحس ان الريس مش عارف اى حاجة عن اللى بتدور فى البلد و لا عن احوالنا ولا المعاناة !!
ساعات بفكر ان اللى حوالية بيكدبوا علية و ساعات بحس ان كلهم فى اللعبة سوا..
عمار يا مصر و الف مبروك على ال 30% (دول حتى مجموع مايدخلش معهد)
غير معروف
الشعب هيفوق هيفوق .. ده لو كان هيفوق بعد ميت سنة مثلا بغباء الحكومة بتاعتنا هيفوقوه بكرة ..
أخ جامعة
أنا عارفة القانون بيحتم ان الرواتب تكون مكافأة للأسعار .. يعنى حتى فرضا لو قانونا اللى عمله صح فالزيادة مالهاش أى لازمة لان مين يفرح بـ 60 جنيه زيادة فى مرتبه .. بس هى كانت بمثابة حقنة مخدرة للشعب وللطبقة العريضة من الشعب اللى هما العمال قبل الاضراب الجاى..
محمد عبد القوى
كل العمال قالوا هيييه لما سمعوا الخبر بس كانوا لسة محسبوهاش .. لان فكروا مع نفسهم شوية عرفوا انهم اضحك عليهم ..
سو
الريس عارف كل حاجة كويس أووووى .. ولو مش عارف يبقى بمزاجه وغلطته أولا وأخيرااااا ..
طبعا الناس الغلابة بتقول اللي يجي منه أحسن منه .. وأهي نواية تسند الزير !!
بس ماحدش فكر هل زاد حديد عز بنسبة 30% وهل زاد الزيت والسكر والفول والعدس والمكرونة بنسبة 30 % ..
وباكر سيلتهم غول الغلاء الزيادة المباركية .. وربنا يجعله عامر ..
ونتربى في عزك ياحسني ..
تحياتي
said
ازيك يا انسة عائشة
ولله يعني نسيب عيد الميلاد يحكي
علي رأي عمو عمرو دياب
معاك بجد كان قلبي طيب
مقلتش انا غير حاضر وطيب
وانتا بتدي وعود في الهوا ؟
كل ســ 4/5/2008 ــنة بقي وانت طيب
وعموما يا ستي انا بحييكي ... انا مدون جديد برضة بس يارب استرها والبوليس السري ما يكشفناش بالمنشورات هههههههههههههههههههه
ساعات بننخدع ببعض الكلمات
زياده 30 %
بعض النساء "زغرط " من الفرح عندما سمع الخبر
لكن بعد التأمل
عاد كل شئ إلى طبيعته !!!!!!
عائشه
انتى فاكره الناس اللى بيلموهم يقعدوهم قدام الريس فى الخطابات الرسميه بتاعة سيادته دول عمال بجد من عامة الشعب لا
دول كمبارس زى كمبارس السينما كده
جايين يهيصوا اول الاشاره ما تنطلق لهم دور يأدوا ولما يخلص يقبضوا ويروحوا زى التمثليه بتاعة المظاهره ايام ضرب العراق الحزب الوطنى عمل مظاهره ضد ضرب العراق وكانوا بيقبضوا الموظفين اللى بيروحوا المظاهره ووجبه كمان
بس اموت واعرف هما كانوا عاملين المظاهره ضد مين مش الحزب الوطنى ده هو اللى بيشكل الحكومه برده يعنى بيتظاهرو ضد نفسهم؟
الواحد خلاص دماغه ضربت
جنى
أنا شايفة ان كفاية عز أوووى كده.. مرة كان ابراهيم عيسى كاتب مقالة بيقول ان دااااايما الرئيس بيقول انه مهتم بالغلابة وبأحوال الغلابة وكل يوم حالهم بيدهور ..فياريت لو الريس ينساهم شوية .. هيعيشوا مرتاحين ..
ديو
هو لسة فيه بوليس سرى ..!!؟؟
بس بصراحة يوم 4\5 يووووم يكسف والله .. الشعب احرجنا مع الحكومة جاااااامد أوووى ..ربنا يسامحكم يا مصريين ..:(
المستكشف\احمد محسن
ياريته عاد لطبيعته .. أنا دمى اتحرق من الخبر أوووى .. واعتقد ان اى عامل بعد ما فاق من المخدر اللى خده لما سمع الخبر دمه اتحرق أكتر منى .. بس مش عارفة راحوا فين العمال يوم 4\5..؟؟؟؟؟
بحبك يا مصر
أكيد طبعا مش عمال .. ما هو مش أى حد برده بينال شرف انه يشوف الريس كده فيس تو فيس ..
بس اموت واعرف هما كانوا عاملين المظاهره ضد مين مش الحزب الوطنى ده هو اللى بيشكل الحكومه برده يعنى بيتظاهرو ضد نفسهم؟
ديه قمة الديموقراطية الحزب بيتظاهر ضد نفسه .. ومحدش واخد باله ..:))
آة طبعاً لازم يفرحوا ويغنوا كمان
هما كانوا طايلين حاجة
ياستى انتى متعرفيش حاجة صدقينى
دا الواقع منيل بستين نيلة واللى يفتح بقة يترفد
30% من إجمالي مرتبات الدرجه الممتازه تعني 195 جنيه...بالطبع هما دول اللي هايعيش بيهم موظف الدرجه المنتازه...على فكره القطاع الخاص خارج الحسابات....علشان ثوابتهم عاليه min1000 l.eفخرجنا من حسابات الحكومه...
اه سعر البنزين غلي النهارده حوالي 30%
يعني معدل الغلو في الاسعار المقترنه بالمواد البتروليه هايغلى بمتوسط 15% والمواد الغير بتروليه وتعتمد عليه هايغلى بمتوسط 9% اذن المتوسط الاجمالي 12% لغلاء الاسعار خلال شهرين وبالتالي اصبحت العلاوه الفعليه 18 % يعني تعالو نعد الشهرين امممم يونيه ويوليه..اه اه فتره كفيله ان الشعب يفهم الكلام ده ويبدأ يراجع حسابات ويعيط..ويطالب بالزياده..هاتدخل الزياده السنويه بتاعت شهر 7 وهايطلع فيها الريس يقول الزياده السنويه بتاعت 7 لن اسمح ان تقل عن 11.5%(اصلها بتوصل ل 7% بيني وبينكم)وعلى الحكومه تدبير مواردها لعمل اللازم... الحسابات خارج المؤسسات الخاصه والاستثماريه ...اااااااااااااه ياليتني لم اولد مفكرا
ازيك يافندم ومبروك انشاء المدونه الجميله دي..
م/محمد..
من مقاطعة حاسب ياريس...؟؟؟
حاسب الي لكل بيت..
دعاء مواجهات
محدش عارف حاجة فعلا .. ربنا يستر من اللى جاى..
غير معروف..
لا قطاع عام ولا خاص .. كله زى بعضه فى مصر .. ومحدش عارف ياخد حقه ..
ازيك يافندم ومبروك انشاء المدونه الجميله دي..
الله يبارك فيك يافندم..
إرسال تعليق