السبت، 21 يونيو 2008

حاجات كتيـــر..!!


أصعب حاجة على الإنسان بتكون الحاجة اللى مش قادر يتخيل ملامحها .. هو صحيح متوقع حدوثها .. أو متأكد منه بس لأنه مش عارف ازاى هتستمر الحياة بعدها بيصاب بحالة من حالات التوهان وفقدان التركيز والقدرة على تخيل الأشياء .. سعات بقول الصح إن الإنسان يعيش اللحظة ومش لازم يتخيل بكرة فيه ايه .. بس فى نفس الوقت لو بكرة جه بدون تجهيزاته هتكون الصدمة أكبر..:(

ديه هلوسة .. هبقى اكتب سببها بعدين .. بس البوست ده كاتباه لأن وحشنى التدوين وفى نفس الوقت معنديش حاجة أقولها .. فقلت هفضفض شوية على مدونتى .. بدخل المدونة وبخرج تانى من غير ما أضيف حتى رد .. ممكن سبب كمان انى مليت شكل المدونة وعايزة أغير فيها كل شئ .. عايزة أحس بالتغيير فيها ..

أخر حاجة هقولها .. إن أجمل شئ فى الدنيا إن الإنسان يحس بـ"معية الله " .. إحساس جميل أوووى ون ربنا معاك فى كل خطوة وكل إختيار وكل قرار بتاخده فى حياتك .. والأحلى إن ربنا هيكون معاك وقت ماتحتاج انه يكون معاك ..

الثلاثاء، 3 يونيو 2008

BackTo Life..

عدنا والعود أحمد..:)

إنهاردة بس حسيت إنى رجعت لحياتى تانى .. مش بس لأنى خلصت امتحانات .. بس عشان النت كان مش شغال و رجع انهاردة ..والله مش عارفة ازاى الناس اللى قبلينا كانوا عايشين من غير نت ..

من الحاجات الغريبة اللى كانت ايام الامتحانات انى كل يوم بعد ما كنت بخلص امتحان كنت بطلع على البحر .. بس والله سبحان الله الألوان اللى بنشوفها بتختلف حسب الحالة المزاجية بتاعتنا .. لما خلصت امتحانات شفت البحر بلون تانى خااااالص..وحاجات تانية كتير ..الحمدلله ان السنة ديه عدت وياااااارب تكون بالتوفيق ليا ولكل الطلبة الغلابة ..:)


الأحد، 18 مايو 2008

هى فين الحكومة ..؟؟


الموضوع ده رد على تعليق احمد مصرى على موضوع انجازات حكومتنا الرشيدة ..حبيت افرد للرد موضوع مخصوص لأنه هيكون رد مطول شوية ..




ahmedmisry يقول...
بصراحة أنا مصدوم فى الموضوع للدرجة دى مفيش حسنات ياخوانا راعوا ضميركم فى الكتابة انتمم مصرين تشوفوا السيئات بس بالله عليكم هل الحوادث اللى ذكرتوها مش موجودة فى اى حته فى العالم ؟راعوا ضميركم شوية وبطلوا النظرات المشخنصة ده أنا حزين جدا بصراحة وعاوز أسالك بقى ياختى الكريمة يامن وضعتى الموضوع ده هل تعليمك فى المدارس الوطنية مش حسنة هل الطرق اللى بتمشى عليها مش حسنة هل المستشفيات اللى بتروحيها مش حسنةهل الجامعة اللى انت فيها مش حسنة هل الملاهى والشواطىء أيا كان انتمائها للقطاع الحكومى أو الخاص مش حسنة وغيره وغيره انت مصريين تنحازوا للنقد الهدام وعاوزين تنحلوا من المسئولية المفروضة عليكم فى تغيرر وضع الوطن للأفضلوثقوا بأن الله لا يغير ما بقوم حتى يغيروا ما بأنفسهم وشوفوا حال العراق ولبنان وسوريا وقارنوا كده بالنعيم اللى احنا فيه ولى عودة لاحقاً مع العلم أعجبنى رد الأخ وليد المصرى سلام عليكم




أولا اجابة على أول سؤال لحضرتك هلى الحوادث ديه مش موجودة فى أى مكان فى العالم .. فأنا كتبت فى اخر البوست



ومفيش ولا حادث من الحوادث ديه عوقب فيها مسؤول أو استقال او اقيل او اى حاااااااااااجة ..



يعنى شئ طبيعى ان تحصل حوادث فى أى مكان فى العالم وفى أى دولة مهما كان تقدمها .. بس اللى مش طبيعى ان الحوادث ديه يكون فيه مسؤولين عنها أو مقصريين وكانوا سبب من أسباب حدوثها وميتعاقبش المقصر.. حتى اللى بيتعاقب بيكون كبش فدا .. موظف صغير يقال او يحاكم أو أو أو... ويترك الجانى او المسؤول الحقيقى..


ــــــــــــــــــــــــــــــــــــــــــ



المجموعة التانية من الأسألة اللى حضرتك سألتها..



هل تعليمك فى المدارس الوطنية مش حسنة؟



صراحة لا مش حسنة اطلاقا.. أنا كنت من مرحلة حضانة لإعدادى فى مدرسة خاصة وكانوا بيكلمونا كتير عن المدارس الحكومية ومساوئها بس مكنتش بصدق .. لغاية ما دخلت المرحلة الثانوية ودخلت أقرب مدرسة للبيت وكانت حكومة وأقدر أقول لحضرتك ان فعلا مرحلة الثانوى وخصوصا أولى ثانوى كانت من أسوأ مراحل عمرى .. كانت الصدمة الكبرى فى حياتى والانتقال من عالم المثالية للواقع اللى مصر فيه .. مدرس يدخل ميشرحش ولا كلمة .. والأخلاق طبعاا مش هحكى عليها أعتقد أى حد مرعلى مدرسة حكومية عرف يعنى ايه أخلاق البنات أو المدرسين فيها .. انا فضلت عشر سنين من حياتى مسمعتش ولا كلمة وحشة من مدرس أو طالب ودخلت اولى ثانيوى اتصدمت من أخلاق الناس .. والله اتصدمت وكنت برجع أعيط لماما كل يوم ..



ده طبعا بغض النظر عن ان التعليم فى مصر أصلا نظام فاااااشل جداااااا .. وبالدراسات الطفل المصرى من أذكى أطفال العالم لغاية ما يبدأ تعليم ..الكلام مش من عندى ..


وديه مش كل مساوئ المدارس الوطنية اللى حضرتك بتسأل عنها ..ديه حاجة بسيطة جدااا من الواقع .. الواقع اللى خلانى مستحملش أكمل فى المدرسة وأخدتها منازل ..




هل الطريق اللى بتمشى عليها مش حسنة؟



أنا بجد مش عارفة حضرتك بتسأل السؤال ده بجد ..؟؟؟؟؟


أنا بس ممكن أخد صورة للشارع اللى أنا ساكنة فيه ..والصورة هتكون أحسن جواب عن سؤال حضرتك..
فى شارع فى منطقة اسمها فيكتوريا فى اسكندرية الشارع متكسر جداااا ولما راحوا السكان يشتكوا فى الحى الموظف طلعلهم ورق يثبت ان الشارع متسفلت من كام شهر .. واتصرف عليه 12 مليون جنيه..!!!!!!!!!!!!!!
الـ12 مليون دول راحوا فين..؟؟؟؟؟؟؟؟؟؟
هل المستشفيات اللى بتروحيها مش حسنة؟

لا مش حسنة برده .. أكبر مثال مستشفى الميرى .. مستشفى سيئة جدااااا..شوف كمية الأهمال اللى فيها..

كانت مرة منى شاذلى استضافت أهالى ناس اتوفوا فى مستشفى .. 8 فى أسبوع واحد بنفس السبب .. تتخيل اللى ماتوا هما السبب فى موتهم..؟؟

ديه مثال المستشفيات اللى مصر ..الحكومى مافيهاش قدرات تعالج مرضى .. والخاصة بتستنزف دم الغلابة .. ومش بتعالج بدون مقدم ..!!

هل الملاهى والشواطىء أيا كان انتمائها للقطاع الحكومى أو الخاص مش حسنة وغيره ؟

هو فيه شواطئ وملاهى مش خاصة..؟؟!!!!

شواطئ اسكندرية اللى المفروض انها عامة محدش بيدخل عليها بدون ما يدفع..ده غير الكراسى والشمسيات اللى بتتأجر..والمفروض يعنى انها شواطئ غلابة ..اللى هى الشواطئ اللى المفروض انها عامة مش فينسيا وشواطئ المعمورة والمنتزة..

مين اللى سايب اى حد يقف على شاطئ وياخد فلوس عافية من الشواطئ ديه..؟؟

وعشان حضرتك بتقول حسنات وسيئات .. فالحقيقة ان مصروالحمدلله مليانة حسنات .. بس الحكومة بتاعتنا مالهاش ولا حسنة فيهم .. ده لو اتعين وزير وعمل حاجة "غلط" فى مصلحة البلد بيتشال فى أول تغيير..

النقد اللى فى الموضوع سلبى أها ..انما هدام لا.. اللى لسة بيقول فى أمل فى حومتنا يقول بعد كل مصايبهم دول فين الأمل فيهم ..






الأربعاء، 7 مايو 2008

اضرابات ..!!!؟؟؟





انهاردة فى الدستور فيه مقال عن الاخوان والاضراب الأخير _الفااااااشل جداااااا _ بتاع 4 مايو .. المقال بيقول ان الاخوان ماشاركوش فى أضراب 6 ابريل والاضراب نجح ولما كان اضراب 4 مايو اللى تحت رعايتهم الاضراب فشل .. مبدأيا أنا أصلا كنت رافضة فكرة ان الاخوان يشاركوا فى الاضراب ده بشكل رسمى .. بس بغض النظر عن اللى كان نفسى فيه فهما شاركوا .. لما نيجى نحكم على الاضراب منقولش تحت رعايتهم لانهم لا هما اللى دعوا ليه و لا صحاب الفكرة .. وبعدين اللى بيقول ان الاضراب بتاع 4 مايو بين حجم الاخوان الحقيقى فى الشارع المصرى ده يبقى دماغه على قده أوووى صراحة .. لان لو فكرنا فيها بموضعيه شوية وقارنا الوضع فى الاضرابين عشان نشوف ايه سبب نجاح الاضراب الأول وفشل التانى هنلاقى الآتى:


أولا اضراب 6 ابريل كان أول تجربة للشعب المصرى وللشباب وفكرة جديدة مجربهاش الشعب المصرى قبل كده ..


ثانيا الحكومة بتاعتنا اللى ربنا بيزود رصيد حسانتنا بيها رعبت الشعب المصرى من قبل الاضراب بيومين واللى هيضرب هيشوف اللى عمره ما شافه وحاجات تخووووف أى حد مالوش دعوة بالسياسة كان مش هينزل من بيته..


وكانت أكبر دعاية للإضراب هى قنوات التلفزيون المصرى الحكومية ..كان فيهم الخير ..


ثاااااااالثا الجو كان صعب جدااااا يوم 6 ابريل فاللى مكنش ناوى يضرب أضرب غصب عنه بسبب سوء الأحوال الجوية ..




نيجى لإضراب 4 مايو .. أولا الشعب مالقاش أى رد فعل من الحكومة لا أسعار قلت ولا حاجة حصلت ولا الاضراب أثر فى الحكومة "طبعا ده من وجهة نظر عامة الشعب "


ثانيا حقنة البنج اللى عطاها الريس للعمال قبل الاضراب مبااااااااشرة





كان ليا حق لما قلت الحكومة لسة فيها قلة قليييييييييلة جدااا بيفكروا ..

وفعلا كان أكبر مقلب شربه الشعب .. واللى تعطف بيه ريسنا على العمال خده أضعاف أضعاف..






أخيرااااااا وديه أهم نقطة لو الاخوان هما سبب فشل الاضراب الأخير وان رعايتهم ليه بينت حجمهم الحقيقى ..فعلى الأقل يعنى كان هيضرب نفس العدد اللى أضرب يوم 6 ابريل ومش هيقدر الأخوان يحشدوا عدد أكبر من كده .. !!



باختصار اللى عايزة أقوله لا عدم مشاركة الأخوان سبب نجاح اضراب 6 ابريل ولا مشاركتهم سبب فشل اضراب 4 مايو .. الشعب المصرى محتاج كورسات فى كيفية مواجهة الواقع المرير اللى بيمر بيه .. محتاجين حد يقول لازم نعمل كده ومنعملش كزا .. محتاجين نعرف بجد ازاى نواجه اللى احنا بنمر بيه بأسلم الطرق عشان متوصلش فى الأخر لثورة تضيع فيها أرواح والله أعلم هيكون مين فيها الكسبان ومين الخسران ..





أخييييييييرا الصورة ديه لاقيتها فى محطة بنزين .. عجبتنى وقلت لااااازم افرجها لزوار مدونتى العزيزة ..:)




بالنسبة لحب الشعب ليه فهو بااااين أهو .. انما أحبك الله ........!!!!؟؟؟؟؟؟؟؟؟؟؟

الخميس، 1 مايو 2008

افرحوا يا عمال مصر ..

أولا .. انا عارفة انى مدونة "بكسر الواو " جديدة والمفروض مسبش مدونتى مدة كبييير كده من غير اجدد فيها بس مش غير ما أقول الكل حاسس بمعناة الطلاب فى هذه الفترة العصيبة من العام الدراسى .. والله حاسة انى بحارب عشان أفضل عايشة فى العالم اللى حواليا وحاسة بيهم لانى لو سبت نفسى مش هعرف أى حاجة فى الدنيا غير بس المناهج واللى بتتكلم عليه والحاجات عديمة الفائدة ديه ..
من ضمن محاولاتى للتعايش مع العالم اللى حواليا ومعرفة أخباره عرفت الخبر السعيد جدااااا على كل العمال فى بر مصر المحروسة وهو زيادة الأجور بنسبة 30% .. انبليفبوووول .. شئ لا يصدق .. ريسنا العظيم انهاردة وهو بيلقى الخبر على العمال كنت حاسة انه بيتبرع بالزيادة من جيبه الخاص .. فيه الخير ..
سرحت شوية فى التفكير وكان نفسى اعرف عمال مصر دول مرتباتهم كام يعنى .. قلت يوم ما عامل يكون معمر فى المهنة بتاعته ما اعتقدش ان مرتبه هيزيد عن 500 جنيه .. يعنى الـ30% دول هيخلوا المرتب بدل 500 هيبقى 630 لا والله بجد حاجة تفرح .. مبرووووك ياعمال مصر .. هتعرفوا تعيشوا مرتاحين ومبسوطين ومرفهين من هنا ورايح .. الأحلى بئة انى فوقت من الحلم ده على برنامج العاشرة مساءا وكانت مستضيفة عامل .. قال انه بقاله 12 سنة شغال ومرتبه الأساسى 250 جنيه ....!!!!!
يعنى حتى حلم الـ 500 جنيه طلع غلط .. 200 جنيه يعنى بعد اكرامية الريس والارتفاع العظيم اللى هتشده المرتبات هيبقى مرتبه 260 ..
لا فعلا حقهم يفرحوا ..
وهنعيش بئة على الارتفاع ده كااااااام سنة .. فيهم هتتضاعف كل الاسعار .. واللى يتكلم هيقولوا زودنالكم المرتب .. ترتفع مصاريف التعليم وبرده محدش يتكلم .. زودنا المرتبات .. اى حاجة تحصل .. زودنا المرتب ..
السنة اللى فاتت كنت بتدرب فى شركة البتروكيماويات المصرية .. شركة بترول حكوميه .. المهندس اللى كان بيدربنى قالنا خطوات الشغل فى الشركة .. أولا مافيش مانع تفضل 7 سنيين بعقد من غير ما تتثبت .. يعنى المهندسين دول بيشوفوا الآمريين والله وبعد كده كمان لما ييجوا يشتغلوا ميتثبتوش .. طيب يعنى بفرض واحد واسطة واتثبت مرتبه هيبقى كام .. لو حابين تتصدموا زى ما اتصدمت هقولكم..
170 جنيه ..دول أقل من مصاريف الكلية .. والله مش عارفة أضحك ولا أعيط .. وحتى فى الشركات الخاصة واحد قريبى بيشتغل مدير فى شركة كبيرة جداا للبترول بيقولى انه اول ما اتعين المفروض انالشركة ديه مرتباتهم بالدولار .. بس طبعا صحاب الشركة أذكى من كده بكتير .. مثلا هو أول ما اتعين اتعين بـ 1000 دولار والدولار كان بـ 3 جنيه .. كانوا بيدوههم المرتبات بالجنيه المصرى .. يعنى الدولار بئة بـ 6 جنيه وهما لسة بياخدوا الـ3000 جنيه هما هماهم .. والله كل البلد مظلومين مش عمال الشركات الحكومية بس .. ومحدش طبعا كان يقدر يتكلم فى الشركة لان ملاكها أمراء عرب من السعودية والكويت وووو ..
فعلا مش لاقية كلام أقوله بعد كل ده أقوله غير "عمار يامصر"
ومبرووووك ياعمال مصر ... وكل سنة وانتم طيبين

السبت، 19 أبريل 2008

مواقف من مؤتمر ضحايا..!


انهاردة كان فى مؤتمر فى مركز ضحايا عن ضحايا العيش والعسكرية والحرية والاضراب وكل حاجة .. انا صراحة مكنتش ناوية أغطى الاضراب ..يعنى ديه مش تغطية ليه .. بس فى كذا موقف عدوا فى المؤتمر ده صرحاة اثروا فيا أوى ..
أولهم ..

الراجل ده والدته اتوفت .. أكيد عادى انها تتوفى كلنا هنموت .. بس هى ماتت محروقة ..بعد شهر عذاب فى المستشفى

شاب بلطجى .. عنده 24 سنة رمى على الفرن اللى هى واقفة ادامه من الساعة 8 الصبح 2 لتر جاز ..


التانى..

كريم .. طالب فى جامعة الاسكندرية .. وابن عم شهيد المحلة .. وحكى المهزلة اللى حصلت بعد استشهاد ابن عمه .. اللى والدته كانت لسة متوفية قبله بمدة مش كبيرة بسبب السرطان .. لما الرصاص أصابه مكنش لسة اتوفى .. اتصلوا بالاسعاف رفضت تيجى..

اتصلوا بالنجدة برده رفضت تيجى.. لغاية ما واحد جارهم معاه عربية نقله بس للأسف محدش لحق ينقذه ..

الثالث..

التالت أكتر واحد بجد أثر فيا .. عشان قصته بس الاهم لانه بكى .. والل كنت بدارى دموعى وهو بيتكلم .. بكيت لدموعه مش لقصته .. حكايته مع بلطجية النظام .. مع ظابط .. قمة الظلم وهو بيحكى على الضرب والسب اللى اتعرضله بس لأنه انسان مصرى عنده كرامة رفض يتشتم من الظابط .. واتعرض بسبب كده للضرب والتعذيب النفسى قبل البدنى..

الموقف الرابع ..

بجد كوكى الصغنن ده كان أحلى ما فى المؤتمر .. كان عامل دوشة وعطيته ميدالية المفاتيح عشان يسكت .. ولد زى العسل والبراءة فى عنيه بجد ماشااا ء الله..

كوكى الصغنن ده يبقى حفيد باشمهندس مدحت الحداد .. اللى اتحكم عليه عسكريا بـ3 سنين لتانى مرة ..

الولد زى ما د\ فاطمة الحداد قالت فى الكلمة اللى القتها فى المؤتمر .. ما يعرفش جده .. جده اعتقل وهو عنده أشهر تقريبا 4 شهور .. وهيطلع وهو عنده 3 سنين ونص .. برده بلطجة نظام .. الولد ده هيطلع ايه لما يكبر.. ؟؟

الله أعلم .. بس الأكيد انه هيطلع كاره للنظام ده من كل قلبه .. اللى حرمه من جده ظلم ..

اللى عايز يعرف المؤتمر بالتفصيل يدخل على مدونة يلا نفضحهم الصوت الاعلامى للمركز ..

الخميس، 10 أبريل 2008

انجازات حكومتنا الرشيدة .. !!

جزيرة القرصاية..معلش الجزيرة مش للعامة .. المستثمرين أولى.

جزيرة فيها 2000 أسرة .. والمطلوب من الحكومة تشريد اهاليها ..








ضحايا تعذيب الشرطة ..

حتى البنات لم يسلموا..!



عماد الكبير



2355 حالة انتحار فى عام 2006
معظمهم شباب.. وأغلب الاسباب ترجع لعدم القدرة على تحقيق مطالب عائلتهم المادية




شهيد جامعة الاسكندرية محمد السقا






مسلسل انهيار العقارات


عمارة عباس العقاد
عمارة لوران






حريق مسرح بنى سويف





ضحايا غرق العبارات وأهاليهم ..







مسلسل حوادث القطارات..








حريق قلعة الكبش..










القبض على اسراء عبد الفتاح ..

لانها دعت الناس تقعد فى بيتها.. مش ينزلوا ويكسروا فى عربيات أمن الدولة ويرموا قنابل مسيلة للدموع ويستخدموا الرصاص الحى ويرشوا الناس بخراطيم المياه ..

فكان لازم يبقى آخرها عربية الترحيلات ..







وأخيرا وليس آخراااا .. شهيد لم يتجاوز الـ15 من عمره






ويستمر مسلسل انجازات الحكومة .. حد يقولهم كفاااااااية انجازت كده..تعبنا انجاازاات



عايزين مصر اللى سرقتوها مننا .. عايزين حريتنا تااااااااااانى ..




مش عايزنكم خلااااااااااااااااااااااااااااص


..

ديه انجازات قليلة جداااااااا من انجازات النظام المصرى اللى افتكرته بس.. بس كان لازم اعرضها لانى دمى محروووووووووووووق جداااا ..

ومفيش ولا حادث من الحوادث ديه عوقب فيها مسؤول أو استقال او اقيل او اى حاااااااااااجة ..


حتى شهيد المحلة ماقالوش قتل خطأ..!

الأحد، 6 أبريل 2008

مطلعش كذبة ابريل..!!!





الاضراااااب نجح .. اسكندرية خاااااالية من المارة والعربيات والتكسيات والمشاريع ..

انهاردة اضطريت انزل عشان امتحاناتى .. وكان نفسى جدااااا أروح اصور الاضراب عند الحقانية .. بس ان شاااء الله تتعوض الاضراب الجاى..

المهم انى كنت حاسة ان الاضراب فاشل جداا من قبل ما يبدأ لأسباب كتيرة بس فى نفس الوقت كنت بتمنى من ربنا نجاحه ..


كان عندى امتحان الساعة واحدة يعنى المفروض انه وقت الزروة .. بابا أصر يوصلنى لانى مش هلاقى مواصلات .. وفعلاااا طلعنا لاقينا اسكندرية فاضية جدااااا .. وبصراحة كانت حلوة اوى وهى فاضية .. بالظبط طلعنا من الجراج الساعة 11:53 وصلت الكلية 12:06

ديه معجزة .. من لوران للحضرة 13 دقيقة بس ..!!

ولأول مرة ما نقفش فى ولا اشارة ..شارع الاقبال خدناه دايركت بدون توقف ..





شارع البحر واحنا رايحين..بابا كان ماشى على سرعة 100
شارع شعرااااااوى واحنا مروحين .. والله الشارع ده التكسيات بتتعارك معانا لما بيدخلو فيه..
لانهم بينسوا الاشارة مقفولة ومش بيفتحوها وممكن لوحده ناخد فيه 10 دقايق او اكتر مع انه مش طويل..

شارع أبو قير .. وطبعا غنى عن التعريف.. كل اللى من اسكندرية عارفين معنى ابو قير الساعة 2 الضهر..

سوبر ماركت أعلن اضرابه وقفل بالقفل ..

كاااااااان نفسى اصور أكتر من كده..:(

بس المهم ان الاضراب الحمدلله نجح بنسبة مش قليلة .. يعنى تجاوزت الـ70% من وجهة نظرى ..

يمكن عطى احساس للشعب انه لو قرر يعمل حاجة هينجح فيها ..

السبت، 5 أبريل 2008

الوزير يدخل النار..!

بجد مقالة تستاهل تتقرى .. أكتر من راائعة .. قصة حقيقة ..سبحان الله .. وجعته كلمة اتقى الله .. عقبال حكومتنا ما تحس هى كماااان..
المقالة على جريدة المصريون الاليكترونية
واللينك

الثلاثاء، 25 مارس 2008

البلد بلدهم..واحنا الضيوف..!!


أمريكا رمز البلطجة العالمية .. تروح أى مكان وتعبر من اى مكان وطائراتها تطير فوق أى مكان .. وبوارجها تستقل أى شواطئ فى أى مكان .. حتى القتل .. قتل البشر خدته حق ليها فى أى مكان..
بارجة امريكية اسمها جلوبال بتريوت كانت بتعبر خليج السويس
وغلط زورق مصرى وعبر جنبها.. ازاى ميعرفش ان البيت بيتها واحنا الضيوف .. مش يستأذن..
جزاءا ليه اطلقت النار عليه_حقها_ وأصابت اتنين وقتلت اخر.. برده حقها..
أصلى الاغنية بتقول
قالوا لفرعون ياظالم ..ايه فرعنك قال عبيدى..
أيوة عبيده .. حكام العرب والمسلمين عبيد أمريكا هما اللى فرعنوها..
هما اللى خلوها تمشى تقتل فى خلق ربنا ومحدش بيحاسبها ..
أسوأ احساس فى الدنيا انك تكون حاسس بالظلم ومش عارف تعمل ايه عشان توقفه ..
*************
الزورق ده كان فيه باعة جائلين والباعة هناك متعودين انهم أى سفينة بتعدى بيبيعوا ليهم ..ده شغلهم ..
زى ما البلطجة برده شغلانة أمريكا

الأحد، 23 مارس 2008

اضراب دكاترة الجامعة فى الاسكندرية ..









فعاليات يوم الإضراب..




















الأخوة بتوع الأمن ..كانوا جايين ينظموا الإضراب..:)








دكتور على بركات ..كلية الهندسة _قسم الهندسة المدنية _جامعة الاسكندرية





الدكاترة قالوا ان ديه بس مجرد بداية لو المطالب لم تنفذ بعد أسبوع واحد هيكون فى تصعيد ..


ربنا يستر..



وعملت حوار مع دكتور حجازى حسن مصطفى حجازى


استاذ فى كلية الزراعة جامعة الاسكندرية


وقال ان سبب الاضراب 3 أسباب رئيسية


أولا:زيادة ميزانيات البحث العلمى فى جمهورية مصر العربية


ثانيا:استقلال الجامعة استقلال تام بحيث يكون كل من ينتمى الى الجامعة هو استاذ جامعى ولا تسيس الجامعة ولا تتبع حزب معين بعينه


ولا يتم تعيين رؤساء الجمعيات تبعا لإنتمائهم الحزبى ولكن لقدراتهم العلمية والبحثية فقط


ثالثا:تحسين احوال هيئة أعضاء التدريس المعيشية والترباوية .. وخصوصا ان عضو هيئة التدريس سخر حياته وعلمه لخدمة مجتمعه وابناءه الطلاب وليس البحث على "لقمة العيش" والجرى وراء توفير عيشة هنيه له وابناؤه ..


والمفروض ان تتكفل بها الدولة كما تتكلف بكل من الراقصات والفنانين ولاعبى الكرة..


اعضاء هيئة التدريس بعقولهم الواحد منهم يساوى مائة الف "ابو تريكة" _ماليش دعوة ده كلامه هو والله_ولكن هذا بقدمه وهذا بعقله وعلمه ..وكيف يسخر دكاترة الجامعة كل هذه السخرية بحثا عن لقمة العيش فى حين ان اخرين يحصلون على مايريدون وهم لا يخدمون الدولة كمان يقدم عضو هيئة التدريس..



وبخصوص التصعيد..


بعد الاضراب سوف يتم عمل مجموعة من الاضرابات حتى يستجيب رئيس الوزراء ولا يماطل فى استجابة المطالب .. وان لم يتم الاستجابة فى خلال اسبوع ستستمر هذه الاضرابات..



مراسلتكم من موقع الحدث..:)


عائشة..


السبت، 22 مارس 2008

مؤتمر "معا ضد الفساد والاستبداد"

ديه صور لمؤتمر حاشد قام بيه الاخوان المسلمين فى الاسكندرية تحت شعار"معا ضد الفساد والاستبداد"











الاستاذ حمدى سليمان
مرشح الاخوان للمحليات..


الاستاذ صابر أبو الفتوح عضو برلمانى





الاستاذة وفاء السعيد ..
مرشحة الاخوان فى المحليات





المؤتمر كان حاشد جداا ومنظم بصراحة وده جانب من الحضور


تفاعل الجمهور مع الأناشيد



وطبعا طبعا الاخوة بتوع الأمن متعودين يشرفوا اى مؤتمر ..:)

واحنا مروحين ..البنت مروة صاحبة مدونة حلم الحرية بصتلهم بصرة شرانية وقالتلهم ..(طبعا بصوت محدش سمعه غيرى)
اشكرونا احنا اللى بنأكلكم ..:)
ومن غيرنا مش هتلاقوا شغل وهتقعدوا فى البيت..

شكلها اخوانجية البت ديه..

مممم.. صراحة روحت مبسوطة من المؤتمر ..بس مش فاهمة كان ايه الهدف منه..!!

مع ان كان فيه توصيات فى نهاية المؤتمر بس مش عملية .. او من وجهة نظرى..

عامة هى خطوة كويسة من الاخوان انهم يتحركوا فى مواجهة الفساد ومش بس المحليات ..بس الفساد اللى وصل بينا الحال لان الناس تصحى من الفجر تقف فى طوابير عيش اكتر من 5 ساعات..وده اللى صرحوا بيه فى المؤتمر..