البلد بلدهم..واحنا الضيوف..!!

أمريكا رمز البلطجة العالمية .. تروح أى مكان وتعبر من اى مكان وطائراتها تطير فوق أى مكان .. وبوارجها تستقل أى شواطئ فى أى مكان .. حتى القتل .. قتل البشر خدته حق ليها فى أى مكان..

بارجة امريكية اسمها جلوبال بتريوت كانت بتعبر خليج السويس

وغلط زورق مصرى وعبر جنبها.. ازاى ميعرفش ان البيت بيتها واحنا الضيوف .. مش يستأذن..

جزاءا ليه اطلقت النار عليه_حقها_ وأصابت اتنين وقتلت اخر.. برده حقها..

أصلى الاغنية بتقول

قالوا لفرعون ياظالم ..ايه فرعنك قال عبيدى..

أيوة عبيده .. حكام العرب والمسلمين عبيد أمريكا هما اللى فرعنوها..

هما اللى خلوها تمشى تقتل فى خلق ربنا ومحدش بيحاسبها ..

أسوأ احساس فى الدنيا انك تكون حاسس بالظلم ومش عارف تعمل ايه عشان توقفه ..

*************

الزورق ده كان فيه باعة جائلين والباعة هناك متعودين انهم أى سفينة بتعدى بيبيعوا ليهم ..ده شغلهم ..

زى ما البلطجة برده شغلانة أمريكا

اضراب دكاترة الجامعة فى الاسكندرية ..

فعاليات يوم الإضراب..

الأخوة بتوع الأمن ..كانوا جايين ينظموا الإضراب..:)

دكتور على بركات ..كلية الهندسة _قسم الهندسة المدنية _جامعة الاسكندرية

الدكاترة قالوا ان ديه بس مجرد بداية لو المطالب لم تنفذ بعد أسبوع واحد هيكون فى تصعيد ..

ربنا يستر..

وعملت حوار مع دكتور حجازى حسن مصطفى حجازى

استاذ فى كلية الزراعة جامعة الاسكندرية

وقال ان سبب الاضراب 3 أسباب رئيسية

أولا:زيادة ميزانيات البحث العلمى فى جمهورية مصر العربية

ثانيا:استقلال الجامعة استقلال تام بحيث يكون كل من ينتمى الى الجامعة هو استاذ جامعى ولا تسيس الجامعة ولا تتبع حزب معين بعينه

ولا يتم تعيين رؤساء الجمعيات تبعا لإنتمائهم الحزبى ولكن لقدراتهم العلمية والبحثية فقط

ثالثا:تحسين احوال هيئة أعضاء التدريس المعيشية والترباوية .. وخصوصا ان عضو هيئة التدريس سخر حياته وعلمه لخدمة مجتمعه وابناءه الطلاب وليس البحث على "لقمة العيش" والجرى وراء توفير عيشة هنيه له وابناؤه ..

والمفروض ان تتكفل بها الدولة كما تتكلف بكل من الراقصات والفنانين ولاعبى الكرة..

اعضاء هيئة التدريس بعقولهم الواحد منهم يساوى مائة الف "ابو تريكة" _ماليش دعوة ده كلامه هو والله_ولكن هذا بقدمه وهذا بعقله وعلمه ..وكيف يسخر دكاترة الجامعة كل هذه السخرية بحثا عن لقمة العيش فى حين ان اخرين يحصلون على مايريدون وهم لا يخدمون الدولة كمان يقدم عضو هيئة التدريس..

وبخصوص التصعيد..

بعد الاضراب سوف يتم عمل مجموعة من الاضرابات حتى يستجيب رئيس الوزراء ولا يماطل فى استجابة المطالب .. وان لم يتم الاستجابة فى خلال اسبوع ستستمر هذه الاضرابات..

مراسلتكم من موقع الحدث..:)

عائشة..

مؤتمر "معا ضد الفساد والاستبداد"

ديه صور لمؤتمر حاشد قام بيه الاخوان المسلمين فى الاسكندرية تحت شعار"معا ضد الفساد والاستبداد"

الاستاذ حمدى سليمان
مرشح الاخوان للمحليات..

الاستاذ صابر أبو الفتوح عضو برلمانى

الاستاذة وفاء السعيد ..
مرشحة الاخوان فى المحليات

المؤتمر كان حاشد جداا ومنظم بصراحة وده جانب من الحضور

تفاعل الجمهور مع الأناشيد

وطبعا طبعا الاخوة بتوع الأمن متعودين يشرفوا اى مؤتمر ..:)

واحنا مروحين ..البنت مروة صاحبة مدونة حلم الحرية بصتلهم بصرة شرانية وقالتلهم ..(طبعا بصوت محدش سمعه غيرى)

اشكرونا احنا اللى بنأكلكم ..:)

ومن غيرنا مش هتلاقوا شغل وهتقعدوا فى البيت..

شكلها اخوانجية البت ديه..

مممم.. صراحة روحت مبسوطة من المؤتمر ..بس مش فاهمة كان ايه الهدف منه..!!

مع ان كان فيه توصيات فى نهاية المؤتمر بس مش عملية .. او من وجهة نظرى..

عامة هى خطوة كويسة من الاخوان انهم يتحركوا فى مواجهة الفساد ومش بس المحليات ..بس الفساد اللى وصل بينا الحال لان الناس تصحى من الفجر تقف فى طوابير عيش اكتر من 5 ساعات..وده اللى صرحوا بيه فى المؤتمر..

SaD EgypT..!

بجد حاجة غريييييبة .. وأكيد الكل ملاحظها .. تمشى فى الشارع الناس كلها مكشرة .. تدخل الكلية مفيش طالب بيبتسم .. تقابل صحابك مبيتكلموش .. مالكم.؟؟.عندنا حالة إكتئاب..

الناس كلها اصيبت بحالة إكتئاب .. لدرجة بنات فى الكلية بياخدوا أدوية اكتئاب..!! اتصدمت..

المعيدين والدكاترة بيدخلوا المحاضرات والسكاشن مش طايقيين يشرحوا .. الشااااارع المصرى كله مكتئب .. واحدة قربتى كانت برة مصر بقالها مدة ورجعت بتقولى حالكم اتغير كتير وبجد باين على الناس الكآبة..



أنا مش بقول ان الوضع هنا فى بلدنا سعيد .. .. بس اللى مش صح اننا نستسلم للحالة ديه ..مين بيمر بالحالة ديه دلوقتى وعنده استعداد يعمل للبلد حاجة .. معتقدش فيه ..!!

الحالة ديه أصابت الناس بانعداااام الامل .. وخوف من بكرة ..محدش متوقع ايه اللى هيحصل بكرة .. حتى الناس السياسيين لما بيتسألوا ماذا بعد ..بيقولو محدش عارف..



اعتقد اننا لاااازم _احنا كشباب_ نعمل حاجة نطلع المجتمع بتاعتنا من الحالة ديه .. أولها اننا ندعوهم للتفاؤل ..وبجد الكلام بيأثر كتير ..يعنى لما حد يشتكى من أوضاعه وأوضاع بلده اسمعه اه بس متتأثرش بكلامه ..خليه هو اللى يتأثر بكلامك .. متسبهوش غير لما يبتسم ..وابتسامه طالعة من قلبه بجد .. عارفة ان الكلام صعب وخصوصا لو اننا مش حاسين بيه .. بس مبدأيا لو قدرنا نغير الحالة اللى احنا فيها هنقدر هنغيرها فى اللى حولينا ..




ابتسموا برغم اللى بيحصل عشان نقدر نغير ..اللى زعلنى أكتر ان الشباب اللى هما روح التفاؤل هما كمان اكتأبوا ..كنت بلف على مدونات ولقيت أكتر من موضوع عن اكتئاب صاحب المدونة .. واللى بيرجع البيت بدرى عشان يهرب من الكآبة اللى سادت على وجوه المواطنين برة..

نفسى يتغير الحال سريعا ومانستمر فى حالة الكآبة اللى ادت لخمول ديه كتير..بلدنا محتاجة قلوب متفاءلة ومليانة نشاط وشايفة مصر اللى نفسها تشوفها ..مش مصر الحالية اللى محدش عايز يشوفها.. عايزين ناس عندها أمل فى التغيير ..


وأخيرااااااااااااااااا

تفااااااءلوا بالخير تجدوووه ...

رحيل..!

لم يفرق الموت بين كبير وصغير .. رحلت عن عالمنا اليوم لتلحق بصديقتها التى فقدتها منذ عامين امام عينيها..

رحمهما الله..

انتظروها ..قريبا..!!

نحن شعب يخال الخبز فى البعد بدرا..!!

الجملة ديه سمعتها كتير أوى من دكتورابراهيم كان بيدينى فى سنة أولى بس مفهمتلهاش معنى غير دلوقتى ..مجاش فى بالى يوم ان الناس هيتساوى عندها البدر والخبز غير لما شفت بعينى.. مش البدر اللى اتساوى بالخبز بس لا ..ديه حياتهم كلها .. الناس بتضحى بنفسها عشان تشترى كل يوم 5 ارغفة ..!!
وصل عدد الضحايا أو قتلى العيش أو ممكن نسميهم شهداء العيش بعد الفتوى اللى صدرت امبارح ان قتيل العيش شهيد لـ 13 شهيد ..
سألت واحدة غلبانة جدااا جدااااا عن يومها وازاى بتبدأه .. قالتلى انا بصحى أصلى الفجر وبعدها بجرى على الفرن وبروح بلاقى ناس سبقونى صلوا فى الجامع ورا الامام ووهو بيقول السلام كانوا عند الفرن .. وتيجى واحدة "بلطجية" _حسب وصفها_تزق كل اللى وقفوا قبلها ولو حد اتكلم بيضرب على طول .. وتفضل السيدة ديه من الساعة 6 امام الفرن لغاااااية الساعة 3 وبتكون خلاااص تعبت وسايبة بناتها فى البيت لوحدهم .. وأصابها حالة اختناق اللى بتصيب كل اللى بيشتروا عيش .. وعدى أمامها 3 او 4 عربيات اسعاف بسبب اغماء أحد كبار السن أو اصابة حد بسبب عركة على مين كان واقف قبل الأول أو أو .. المهم ان ميعديش يوم غير وتيجى عربية الاسعاف ..
بعد رحلة الشقاء ديه بتستسلم السيدة الغلبانة وبتضطر انها تشترى من "السوق السودا" حتى العيش فيه سوق سودا .. وهى عبارة عن مجموعة من الجشعين مع انهم غلابة والمفروض يحسوا ببعضهم شوية ..بيشتروا كمية كبير عن طريق البلطجة ويبعوووه بعيد عن الفرن ,, بس ياريت بضعف التمن .. لا ..المهم تكملة رواية السيدة ..بتتجه لواحدة من اللى بيبيعوا عيش على رصيف القطر وبتقولها هاتى بجنيه عيش لاقيتها بتديها 6 رغيف .. أنا للأسف سألتها سؤال ردته بنظرة عجيبة جدااا .. وهو هو الجنيه بيجيب كام من الفرن ..!! قالتلى 20 انا كنت عارفة والله بس اتصدمت ان انه بيتباع على الرصيف بدل 20 بقى 6 .. قلت يبقى معلوماتى غلط ..و بتضطر السيدة انها تشتريه برده بالجنيه متقدرتش تزود عليه .. يعنى بتجيب أقل من الاساسى بتاعها ب_ 14 رغيف .. الناس ديه بجد هتعيش ازاى.. ديه واحدة الـ3 وجبات الاساسية بيعتمدوا على العيش عندها .. خلصت مشوار العيش راحت السوبر ماركت .. أو محل البقالة وكان معاها 10 جنيه قالتله هاتلى فول وعدس و كام حاجة انا مش فاكراها .. الراجل بصلها بابتسامة مصحوبة بحزن قالها :ياحجة العدس ب_ 8 جنيه ونص لوحده ..!!
الست بعد الصدمة قالتله شكرا يابنى .. انا هاخد فول بس ومش عايزة حاجة تانية ..
الست ديه عايشة فى البيت اللى هو بيتها من زمان جدااااااا .. واليوم ده وهى راجعة لبيتها تاهت .. دخلت الشارع بتاعها وقفت مش عارفة تروح فين .. لغاية ما بنتها قابلتها قالتلها مالك ياماما .. ردت :انا مش عارفة احنا فين .. انتى واخدانى على فين ..
والله وهى بتحكى انا دمعت .. الناس فقدت تركيزهابالشكل ده .. الناس ديه عايشة محدش حاسس بيهم ..
للأسف معرفتش أقولها على اى حل بعد ما خلصت كلامها ..
بس فضلت الجملة بتاعت دكتور ابراهيم " نحن شعب نخال الخبز فى البعد بدرا " تتردد فى بالى ..!!
وقلت فى بالى الناس ديه مش هتستحمل كتير .. لحظة انفجارهم قربت .. نفسى أوصلها للحكومة .. من أكتر من 30 سنة حصلت انتفاضة الحرمية .."كما أطلقت عليها السادات " اللى هى فى الاصل كانت انتفاضة الخبز ..
عايزة اقولهم انتظروها قريبااااا ..

ماذا بعد مقاطعتهم ..!!

الصورة ديه صورناها على باب فتح الله ماركت اللى فى جناكليس..عجبتنى جدااا وقلت فعلا ديه لازم تكون أخرة المنتجات الدنماركية ..برغم أصلا ان الحمدلله الشعب المصرى 99% منه مقاطعين المنتجات الدنماركية من باب مجبر أخاك لا بطل .. بسبب المستوى المعيشى وان معظم المنتجات هى ترفيهية مش الاساسية بتاعت البيت المصرى .. مش زى فى السعودية اللى حياتهم الاساسية فى لبنة بوك ولورباك و الخ.....

بس مش ده المهم ..اللى كنت بفكر فيه احنا استفدنا ايه .. خسرناهم اقتصاديا ..!! برده المرة اللى فاتت من سنين اتقال ان المقاطعة تسببت فى خسارة اقتصادية للدنماركيين .. ومع ذلك وبدون اعتذار رسمى منهم رجعنا نشتريها تانى .. يعنى الحل برده اننا بس ندعوا للمقاطعة واننا ندعى عليهم.. ؟؟

معتقدش ان ده هيحقق اى نتيجة ، ومش بعيد كمان سنة يعيدوا نشر الرسوم مرة تالتة ومش فى 17 جريدة اوروبية بس، بس العدد هيتضاعف .. وكده كده الحمدلله حكامنا الافاضل صوتهم مبيطلعش .. والشعوب هى اللى بتفضل تهاتى مع نفسها .. اللى كان لازم يحصل اننا ولا نعير القضية اهتمام أصلا ..مثقفين الشعب اللى عملوا أكتر من ندوة مش فى مصر بس بس على مستوى العالم العربى .. اضافوا ايه غير انهم طرحوا المشكلة ومأوجدوش ليها حلول .. !!

الدنماركيين كسبوا كتير اوى بإعادة نشرهم للرسوم اللى اعتقدوا انها مسيئة للرسول واحنا بالتبعية سمناها مسيئة للرسول ..كسبوا لما شغلونا عن غزة اللى بتتحرق .. وكسبوا لما ألهوا كل شعب بالرسوم وبعدوه عن مشاكله الداخلية .. هما بيفكروا صح وعندهم القدرة انهم يشغلوا الامة العربية فى اى وقت يحسوا انهم فى خطر عشان يبعدوا العيون عن الاحداث الأهم .. وعشان يحسسوا الشعوب بعجزها حتى عن الدفاع عن قدوتها ونبيها محمد عليه الصلاة والسلام .

كان نفسى من الأول الامة كلها تترك هذه الكلاب تعوى .. ويقاطعوا فى صمت مش لازم نحسسهم بنجاح خطتهم ..

الرسول عليه الصلاة والسلام لما أُذى من أهل الطائف وجاءه سيدنا جبريل عليه السلام وقال له " إن شئت يا محمد أن أطبق عليهم الأخشبين" كان رد الرسول عليه الصلاة والسلام " أرجو أن يخرج الله من أصلابهم من يعبد الله وحده لا يشرك به شيئا "..يعنى الرسول برغم الأذى اللى تعرض ليه شخصيا والسب والرمى بالحجارة .. لم يعر الأمر اهتماما ولا شغله عن استمراره فى دعوته .

رسولنا الحبيب تعرض لأكثر مما نتعرض له نحن الان ولكنه أكمل دعوته حتى وصل بديننا الحنيف لأعلى المراتب .. فلنجعل الرسول الكريم قدوتنا ولا نعر هؤلاء السفهاء أدنى اهتمام ..

أخيراااااااا ...

اخيراااااااااا اتعملت المدونة .. بجد والله مش متخيلة مدى سعادتى بانى عملتها خلاص ..لو أعرف انى هفرح كده كنت

عملتها من زماااااان ..القرار ده خد منى وقت كبيييير اوى أكتر من سنة..

حاجات كتير كانت منعانى ..بس نصيحة من صحبتى قالتلى مادام عندك عزيمة اعملى المدونة على طول بدون تفكير..

هى لسة تحت الانشاء .. بس ربنا ييسر ان شااااء الله وتشوفوا فيها احلى شغل .. الله المستعاااان