بجد حاجة غريييييبة .. وأكيد الكل ملاحظها .. تمشى فى الشارع الناس كلها مكشرة .. تدخل الكلية مفيش طالب بيبتسم .. تقابل صحابك مبيتكلموش .. مالكم.؟؟.عندنا حالة إكتئاب..
الناس كلها اصيبت بحالة إكتئاب .. لدرجة بنات فى الكلية بياخدوا أدوية اكتئاب..!! اتصدمت..
المعيدين والدكاترة بيدخلوا المحاضرات والسكاشن مش طايقيين يشرحوا .. الشااااارع المصرى كله مكتئب .. واحدة قربتى كانت برة مصر بقالها مدة ورجعت بتقولى حالكم اتغير كتير وبجد باين على الناس الكآبة..
أنا مش بقول ان الوضع هنا فى بلدنا سعيد .. .. بس اللى مش صح اننا نستسلم للحالة ديه ..مين بيمر بالحالة ديه دلوقتى وعنده استعداد يعمل للبلد حاجة .. معتقدش فيه ..!!
الحالة ديه أصابت الناس بانعداااام الامل .. وخوف من بكرة ..محدش متوقع ايه اللى هيحصل بكرة .. حتى الناس السياسيين لما بيتسألوا ماذا بعد ..بيقولو محدش عارف..
اعتقد اننا لاااازم _احنا كشباب_ نعمل حاجة نطلع المجتمع بتاعتنا من الحالة ديه .. أولها اننا ندعوهم للتفاؤل ..وبجد الكلام بيأثر كتير ..يعنى لما حد يشتكى من أوضاعه وأوضاع بلده اسمعه اه بس متتأثرش بكلامه ..خليه هو اللى يتأثر بكلامك .. متسبهوش غير لما يبتسم ..وابتسامه طالعة من قلبه بجد .. عارفة ان الكلام صعب وخصوصا لو اننا مش حاسين بيه .. بس مبدأيا لو قدرنا نغير الحالة اللى احنا فيها هنقدر هنغيرها فى اللى حولينا ..
ابتسموا برغم اللى بيحصل عشان نقدر نغير ..اللى زعلنى أكتر ان الشباب اللى هما روح التفاؤل هما كمان اكتأبوا ..كنت بلف على مدونات ولقيت أكتر من موضوع عن اكتئاب صاحب المدونة .. واللى بيرجع البيت بدرى عشان يهرب من الكآبة اللى سادت على وجوه المواطنين برة..
نفسى يتغير الحال سريعا ومانستمر فى حالة الكآبة اللى ادت لخمول ديه كتير..بلدنا محتاجة قلوب متفاءلة ومليانة نشاط وشايفة مصر اللى نفسها تشوفها ..مش مصر الحالية اللى محدش عايز يشوفها.. عايزين ناس عندها أمل فى التغيير ..
وأخيرااااااااااااااااا
تفااااااءلوا بالخير تجدوووه ...
هناك 13 تعليقًا:
السلام عليكم ورحمة الله وبركاته
أظن هذا أول تعليق لي
مبروك بدء الإهتمام بالمدونة وإضافات المقالات إليها
بالنسبة لهذا المقالة الذي يعبر عن حالة الكآبة الحقيقية التي يحياها الشعب المصري
الحل الذي طرحتيه حضرتك يا فندم في المدونة لا أظنه حلاً عملياً لأن المشكلة نعاني نحن أيضاً منها
ألسنا من الشعب ألسنا من هذا المجتمع نتأثر بما فيه
أليس الظلم والفساد والسرقة والنهب والتجبر والتزوير والتخريب موجود في هذا البلد
أليس كل هذا مدعاة للكآبة
متي يكون الحل عملي
حينما يتحقق بالفعل من داخلنا ونري له أسباب تساعدنا علي الأخذ به بتحقيق التفاؤل والتمسك بالامل كما رأيتي اختنا في ذلك من حل
لكن...
أين الأسباب التي تدعوا لذلك
للأسف إن وجدت فهي نادرة
لذا فكان الله في عوننا
ونسأل الله أن ييسر لنا ويدخل الفرحة والسعادة علي قلوبنا ويبدلها مكان تلك الكآبة والحزن والأسي وأن يغنينا من فضله وحده
تحياتي
م/محمد
حزينه يا مصر
يأم الهرم
يأم الكرامه
وأم الكرم
حزينه شوارعك
وارضك وولدك
وقمحك وزرعك
حزينه ملامحك بين الامم
حزينه يا مصر
يا أرض النعم
............
الحزن دلوقتي حاجه بسيطه
في ناس تخطى الامر عندها هذه الدرجه ووصلت لحاة الانتحار او الانهايار
واعتقد قريب جدا حابكون كمان انفجار
لكن نحن لا ننيأس ابدا انه لا ييأس من روح الله الا القوم الكافرون
وضاقت فلما استحكمت حلقاتها فرجت وكنت اظنها لاتفرجوا
الشاعر بن هلال
اتمنى ان نتواصل
م\محمد
الحلول الخاصة بالوضع الراهن عايزة صالونات مثقفين وسياسيين ..ومش هتضع حلول بس مش هتكون اكتر من محاولة .. والله اعلم كمان هتقدر توجد حلول عملية للأزمات الكتيرة اللى بتمر بيها بلدنا ولا لا..
انا الحل اللى قلته يكون لتغير نفسنا .. دينا يافندم دعا لعدم التطير .. والكآبة بتوصل للتطير لانه ما بيبقى متوقع أى شى كويس هيحصل..لو متفاءل وعنده أمل هيشجعهانه يستغل أمله وتفاؤله فى شئ عملى .. حتى هيغير من طريقة تفكيرنا ..
ايوة الظروف فعلا صعبة جداا .. بس مش لازم نستسلم ليها .. أنا طرحت تساؤل فى الموضوع .. مين اللى يقدر يغير وهو فى حالة الكآبة ديه ..؟؟
احنا فعلا من المجتمع ..بس المفروض اننا شبابه يعنى روحه اللى بتنبض ..المفروض منبكيش على اللبن المسكوب .. الأزمة موجودة كده كده ومش هيغيرها اكتئبنا بالعكس هيزودها ..لازم نضغط على نفسنا ونرجع فينا روح الحماسة من تانى ..وبعدها نبدأ نبثها فى اللى حولينا..
وجزاكم الله خيرا على أول تعليق وياريت مايكون الأخير..
مقالتك جميله والله بس المشكله الوضع كتير صعب و مفيش ولا حاجه فى البلد ولا اى حاجه من اللى بيحصل تخلى الواحد يفكر حتى فى الابتسام مش انه يبتسم والله انا نفسى ان الحكايه دى تتغير بس هى عمرها مهتتغير الا لما احنا الاول نتغيرو ونتغيرو جامد كمان قال تعالى:(ان الله لايغير ما بقوم حتى يغيرو ما بانفسهم).يعنى لازم نتحرك لازم نعمل حاجه عشان فعلا تقدرى تقولى ان الكابه بدات تزول ..ياااااااااااااارب يدخل الفرحه والسعادة على قلوب المسلمين جميعا.
الشاعر بن هلال
اللى انتحر بدأت عنده باكتئاب يعنى محدش يستصغر الموضوع..
وبجد الناس كتيييييير اوى بدأوا يعرضو نفسهم على دكااترة نفسيين
بس زى ماحضرتك قلت ..المؤمن لا ييأس من روح الله ..
اضافة رائعة .. وأكيد ان شاء الله فى تواصل..
بصى انا حتكلم عن نفسى .. وخصوصا فى الفترة اللى فاتت .. تفاؤل ..تفاؤل فى كل حاجة ومحاولة مع الناس المكتئبة انها تبص للجزء المليان من الكباية .. بس والله ما بقدر على كدة كتير بكتيرها تلات اسابيع والاسبوع الرابع انا اللى بنهار لان بجد بلاقى الكباية كلها فاضية ومفيش ولا نقطة ...
بس هى بتكون فترة قصيرة والاحد يفضل يقول لنفسه ان الفجر بيطلع فى احلك الليل وكل دة ونرجع تانى لاعلى المنحنى ونبتدى فى النزول ... والحل؟؟؟
لازم حاجة تحصل كبيرة تدى للناس أمل ان التغيير جاى ..
ازاى؟؟ لما الناس تبطل ياس وسلبية وتلاقى نتيجة للاجابية .. ازاى بردو؟؟
لما كل واحد يغير من نفسه واللى حواليه ويبقى عنده يقين ان المية بتغير فى الحجر بطول المدى والاصرار ونغير سيناريوهات حياتنا اللى كلها سلبية لسيناريوهات ايجابية اقلها اننا ممكن نغير ولو 10 فى المية من الواقع اللى حوالينا ....
مقالة جيدة ماشاء لله ومنتظرين مقالات اكثر اثارة
قرة الندى
قريت البوست وكمان اول تعلقين ، كلامك فى نهايته فكرنى بحديث رسول الله ( ظن فى الله خيراً تجد خير ) ..وفكرنى كمان بحاة كنت كتبتها زمان تتوافق مع وجهة نظرك ، بتقول:
لما الدنيا تضيق بأحلامنا نلعب طاولة
دورجى ويك...بنج ودوثة واهى محاولة
جايز نخسر اول جولة
جايز نخسر عشرة بحالها
من اولها
لحد اخرها
لكن لسه
لكن لسه فى كمان عشرة
لازم حتما هاكسب مرة
لازم هارجع أضحك نانى
وانسى العشرة السودة المرة
هانسى الماضى..واعيش بكرة
دى الدنيا دي...عايزة مثابرة
عايزة مدوالة
واهى محاولة
مش كل فيها واحشه مصر برضه لسه بخير الفكره من يحكمها عندهم زهيمر
مصر جميله قوى والله
الناس اه معاك ان بقت اكتر اوقات حيتها مكشره ومكتئبه
اه بقت مضيقه من حجات كتير
بس اجمل حاجه فى اهل بلدنا الابتسامه
اه الابتسامه حتى وهو مكتئبين
كلم اى واحد واسئله مالك مكتئب ليه
ممكن يفضل يشتكى من حجات كتير
وفى نص الكلام تلاقيه حطلك نكنته
مش بيقولو علينا شعب ابن نكته
انا لاحظت كده فعلا
اى مشكله بيقع فيها بتلاقيه بيعمل عليها نكت
حتى رغيف العيش عملو عليه نكت
يبقى احنا مش شعب مكتئب كده
ممكن مرحله وتعدى
ممكن الجو نفسه
لكن انا مع الجزء المتفائل من الشعب
رغم انى اكتر واحده ممكن تكون مكتئبه
بس متفائله
متفائله ان بلدنا جميله ومهما كان فيها حجات وحشه فهى جميله
مكتئب اخرج للنيل بص فيه وانت ترتاح
بص فى اى مكان جميل فى بلدنا وانت ترتاااااااااااااح
مصر جميله قوى
غير معروف
فعلا احنا اللى هنغير الوضع وده محتاج امل وتفاؤل..
شاكرة مروورك..
ـــــــــــــ
قرة الندى
حلوة فكرة تغيير سيناريوهات حياتنا..:)
مرورك اسعدنى..
صوت من مصر
والله مصر كل حاجة فيها حلوة .. بس احنا اللى مش شايفين غير الأسود..مع انها نقط قليلة اووى
نورت المدونة..
محمد عبد القوى
كلامك رااائع جدااااااا
اضافتك اسعدتنى كتير..
امواج
احنا فعلا شعب بيحاول يغير من واقعه بالنكتة ..بس للأسف ده بيديله نوع من انواع الرضا بالحال ومعندوش استعداد للتغيير..
وفعلا سواء النيل فى القاهرة او البحر فى الاسكندرية بيخفف علينا كتيييييييير ..ديه عنمة من ربنا..
نورتى المدونة يامواج..
إرسال تعليق