الصورة ديه صورناها على باب فتح الله ماركت اللى فى جناكليس..عجبتنى جدااا وقلت فعلا ديه لازم تكون أخرة المنتجات الدنماركية ..برغم أصلا ان الحمدلله الشعب المصرى 99% منه مقاطعين المنتجات الدنماركية من باب مجبر أخاك لا بطل .. بسبب المستوى المعيشى وان معظم المنتجات هى ترفيهية مش الاساسية بتاعت البيت المصرى .. مش زى فى السعودية اللى حياتهم الاساسية فى لبنة بوك ولورباك و الخ.....
بس مش ده المهم ..اللى كنت بفكر فيه احنا استفدنا ايه .. خسرناهم اقتصاديا ..!! برده المرة اللى فاتت من سنين اتقال ان المقاطعة تسببت فى خسارة اقتصادية للدنماركيين .. ومع ذلك وبدون اعتذار رسمى منهم رجعنا نشتريها تانى .. يعنى الحل برده اننا بس ندعوا للمقاطعة واننا ندعى عليهم.. ؟؟
معتقدش ان ده هيحقق اى نتيجة ، ومش بعيد كمان سنة يعيدوا نشر الرسوم مرة تالتة ومش فى 17 جريدة اوروبية بس، بس العدد هيتضاعف .. وكده كده الحمدلله حكامنا الافاضل صوتهم مبيطلعش .. والشعوب هى اللى بتفضل تهاتى مع نفسها .. اللى كان لازم يحصل اننا ولا نعير القضية اهتمام أصلا ..مثقفين الشعب اللى عملوا أكتر من ندوة مش فى مصر بس بس على مستوى العالم العربى .. اضافوا ايه غير انهم طرحوا المشكلة ومأوجدوش ليها حلول .. !!
الدنماركيين كسبوا كتير اوى بإعادة نشرهم للرسوم اللى اعتقدوا انها مسيئة للرسول واحنا بالتبعية سمناها مسيئة للرسول ..كسبوا لما شغلونا عن غزة اللى بتتحرق .. وكسبوا لما ألهوا كل شعب بالرسوم وبعدوه عن مشاكله الداخلية .. هما بيفكروا صح وعندهم القدرة انهم يشغلوا الامة العربية فى اى وقت يحسوا انهم فى خطر عشان يبعدوا العيون عن الاحداث الأهم .. وعشان يحسسوا الشعوب بعجزها حتى عن الدفاع عن قدوتها ونبيها محمد عليه الصلاة والسلام .
كان نفسى من الأول الامة كلها تترك هذه الكلاب تعوى .. ويقاطعوا فى صمت مش لازم نحسسهم بنجاح خطتهم ..
الرسول عليه الصلاة والسلام لما أُذى من أهل الطائف وجاءه سيدنا جبريل عليه السلام وقال له " إن شئت يا محمد أن أطبق عليهم الأخشبين" كان رد الرسول عليه الصلاة والسلام " أرجو أن يخرج الله من أصلابهم من يعبد الله وحده لا يشرك به شيئا "..يعنى الرسول برغم الأذى اللى تعرض ليه شخصيا والسب والرمى بالحجارة .. لم يعر الأمر اهتماما ولا شغله عن استمراره فى دعوته .
رسولنا الحبيب تعرض لأكثر مما نتعرض له نحن الان ولكنه أكمل دعوته حتى وصل بديننا الحنيف لأعلى المراتب .. فلنجعل الرسول الكريم قدوتنا ولا نعر هؤلاء السفهاء أدنى اهتمام ..
هناك 6 تعليقات:
فى نظرى أن الأهم من المقاطعه الاقتصاديه للدنمارك بل والأهم من قطع العلاقات الدوليه بيننا وبينهم
هو ان نعود جميعا افراد وجماعات الى نهج النبى (ص) وإلى أخلاقه وإلى فهمه الصحيح للإسلام.. بهذا نكون قد نلنا رضاه و حبه الذى هو من رضى وحب الله تعالى
إن الغرب أجبن ما يكون حينما يرانا مستمسكين بسنته وفعله وعمله .. اقوياء بالحق الإلهى (القرأن) حينها لن يجرأ ان يتعرض لنا
وإلا لماذ خرصت الألسن عن الحديث عن اليهود وصنائعهم فى كل مكان إلا من تجبرهم على من يسىء إليهم متهمين إياه بعداء الساميه
إن الغرب إن رأى منا قوه سيخشى القوه
وهذا منطق الكثير منهم لايفقهون غيره
نادر الخطاب
كلام جيد بس المقاطعه ومع اهميتها الشديدة بس مقاطعة الدانمارك من مجانب لن تؤثر في اقتصادها كما تؤثر المقاطعه في اقتصاد كبرى شركات امريكا
ولكن هي ضرورية ويجب أن تستمر
المشكلة هي اننا بنعامل الاوروبيين على انهم فاهمين الاسلام وعارفينه زي كفار قريش بس بيعاندو ..
المشكلة في نظري هي اننا لا ننظر للعلاج بشكل صحيح .. فمن اعتقد ان المقاطعة وحدها هي الرد فهو واهم .. ضروري نوريهم الاسلام بصورة حقيقية .. نستوعبهم .. لإن الاسلام من خصائصه الشمولية والشمولية بتقتضي الاستيعابية العالية والنظام الاسلامي ممكن يستوعب أي نظام في الكون ايا كان ويستوعب أي فكر وأي عقيدة فدورنا الحقيقي هو ايضاح روح رسالتنا ليهم .
بالنسبة للنقطه اللي حضرتك اثرتيها بتاعت الهاءنا عن واقع حياتنا فمعاكي حق فيها 100% وبدءا من الفضائيات وانتهاءا بالجامعات .. ولأول مره اتحاد الطلبة وادارة الجامعه يعملوا مظاهره !! فزي ما الاخوان بيلعبوا على وتر حب الناس للدين لخدمة المشروع الاسلامي وبناؤه فالحكومة اكتشفت الوتر ده مؤخرا وبدأت تستغله لمصلحتها.
بوست جميل وصورة قيمة ومبروك عالمدونين مدونة ناضجة ومتزنة .
اولا مبرووووووووووووووك على المدونة الجديدة
فعلا لازم احنا بنعهرف نعمل الشو الاعلامى كويس جدا
او خلينى اقول احنا بنعرف نتكلم كويس جدا جدا
لكن التطبيق بيبقى تقيل على نفسنا
لو الشعب المصرى كله اهتم بقضية الاساءة للرسول صلى الله عليه وسلم ربع الاهتمام بقضية الحضرى كنا عرفنا نعمل حاجه
وكنا قدرنا نعمل حاجه
كلام وكلام وكلام
بس انا حاسس ان الوقت بتاع الافعال قرب
يمكن اكون بحلم
بس نفسي يتحقق حلمي
نادر الخطاب
أكيد العودة لدين ربنا وسنة نبينا هتكفينا أى شرور .. سواء انتهاك لحرمة دين بمحاولة للإساءة لأشرف خلق الله .. أو بالاساءة للأمة الاسلامية..
وخرصت الالسنة عن جرائم اليهود وعن أكاذيبهم بسبب بسبب قوتهم العسكرية والاقتصادية طبعا بخلاف انهم متمسكين بشوية أكاذيب ..معاداة السامية والارهاب .. وللأسف مصطلحات استخدمها اعلامنا العربى.. واحنا مش مضطرين لاننا نوصل لقوتهم .. لا بس كل اللى محتاجينه قوة تمسكنا بدينا وسنة نبينا .. ديه أعظم قوة ممكن نوصلها .. وهى اللى هتوصل بالمسلمين لقوة عسكرية او اقتصادية .. هى البداية..
أخ جامعة
فعلا الدنماركيين والاوروبيين أغلبهم مش فاهمين الاسلام ولا يعرفوا عنه أكتر من انهم جماعة من البدو يرتحلوا الناقة .. اعلامهم مش بيوصلهم أى شئ صحيح عن الاسلام ولا الاسلاميين غير انهم شوية ارهابيين .. فكرة المقاطعة اساسية لانها بتوريهم ان المسلمين دول يد واحدة وخصوصا دفاعا عن رسولنا الحبيب .. ولما تزيد خسائر المقاطعة هيسألوا مين محمد ده عشان يعملوا كل ده لمجرد رسمة "من وجهة نظرهم" ..
بس لازم تكون بشكل حضارى .. ونظهر ليهم بالمظهر الحضارى اللى لازم يشوفوه فى المسلمين .. وميروجش اعلامنا لخلافات بين علماء وداعيين الأمة بسبب رد فعل واحد لم يعجب الاخر ..ويقال فى الاخر حتى رسولهم بيختلفوا وهما بيدفعوا عنه ..
وبخصوص الحكومة ووتر حب الناس للدين ..فالحكومة لسة فيها قليل من الاذكياء ..
جزاكم الله خيرا على المشاركة اللى اسعدتنى كتير..
محمود السيد
حتى موضوع الحضرى ليه أبعاد سياسية يافندم .. مفيش حاجة بتحصل فى بلدنا بدون تخطيط ..
وياريت يكون وقت الأفعال قرب .. وربنا يحققلك حلمك ..
إرسال تعليق