نحن شعب يخال الخبز فى البعد بدرا..!!
الجملة ديه سمعتها كتير أوى من دكتورابراهيم كان بيدينى فى سنة أولى بس مفهمتلهاش معنى غير دلوقتى ..مجاش فى بالى يوم ان الناس هيتساوى عندها البدر والخبز غير لما شفت بعينى.. مش البدر اللى اتساوى بالخبز بس لا ..ديه حياتهم كلها .. الناس بتضحى بنفسها عشان تشترى كل يوم 5 ارغفة ..!!
وصل عدد الضحايا أو قتلى العيش أو ممكن نسميهم شهداء العيش بعد الفتوى اللى صدرت امبارح ان قتيل العيش شهيد لـ 13 شهيد ..
سألت واحدة غلبانة جدااا جدااااا عن يومها وازاى بتبدأه .. قالتلى انا بصحى أصلى الفجر وبعدها بجرى على الفرن وبروح بلاقى ناس سبقونى صلوا فى الجامع ورا الامام ووهو بيقول السلام كانوا عند الفرن .. وتيجى واحدة "بلطجية" _حسب وصفها_تزق كل اللى وقفوا قبلها ولو حد اتكلم بيضرب على طول .. وتفضل السيدة ديه من الساعة 6 امام الفرن لغاااااية الساعة 3 وبتكون خلاااص تعبت وسايبة بناتها فى البيت لوحدهم .. وأصابها حالة اختناق اللى بتصيب كل اللى بيشتروا عيش .. وعدى أمامها 3 او 4 عربيات اسعاف بسبب اغماء أحد كبار السن أو اصابة حد بسبب عركة على مين كان واقف قبل الأول أو أو .. المهم ان ميعديش يوم غير وتيجى عربية الاسعاف ..
بعد رحلة الشقاء ديه بتستسلم السيدة الغلبانة وبتضطر انها تشترى من "السوق السودا" حتى العيش فيه سوق سودا .. وهى عبارة عن مجموعة من الجشعين مع انهم غلابة والمفروض يحسوا ببعضهم شوية ..بيشتروا كمية كبير عن طريق البلطجة ويبعوووه بعيد عن الفرن ,, بس ياريت بضعف التمن .. لا ..المهم تكملة رواية السيدة ..بتتجه لواحدة من اللى بيبيعوا عيش على رصيف القطر وبتقولها هاتى بجنيه عيش لاقيتها بتديها 6 رغيف .. أنا للأسف سألتها سؤال ردته بنظرة عجيبة جدااا .. وهو هو الجنيه بيجيب كام من الفرن ..!! قالتلى 20 انا كنت عارفة والله بس اتصدمت ان انه بيتباع على الرصيف بدل 20 بقى 6 .. قلت يبقى معلوماتى غلط ..و بتضطر السيدة انها تشتريه برده بالجنيه متقدرتش تزود عليه .. يعنى بتجيب أقل من الاساسى بتاعها ب_ 14 رغيف .. الناس ديه بجد هتعيش ازاى.. ديه واحدة الـ3 وجبات الاساسية بيعتمدوا على العيش عندها .. خلصت مشوار العيش راحت السوبر ماركت .. أو محل البقالة وكان معاها 10 جنيه قالتله هاتلى فول وعدس و كام حاجة انا مش فاكراها .. الراجل بصلها بابتسامة مصحوبة بحزن قالها :ياحجة العدس ب_ 8 جنيه ونص لوحده ..!!
الست بعد الصدمة قالتله شكرا يابنى .. انا هاخد فول بس ومش عايزة حاجة تانية ..
الست ديه عايشة فى البيت اللى هو بيتها من زمان جدااااااا .. واليوم ده وهى راجعة لبيتها تاهت .. دخلت الشارع بتاعها وقفت مش عارفة تروح فين .. لغاية ما بنتها قابلتها قالتلها مالك ياماما .. ردت :انا مش عارفة احنا فين .. انتى واخدانى على فين ..
والله وهى بتحكى انا دمعت .. الناس فقدت تركيزهابالشكل ده .. الناس ديه عايشة محدش حاسس بيهم ..
للأسف معرفتش أقولها على اى حل بعد ما خلصت كلامها ..
بس فضلت الجملة بتاعت دكتور ابراهيم " نحن شعب نخال الخبز فى البعد بدرا " تتردد فى بالى ..!!
وقلت فى بالى الناس ديه مش هتستحمل كتير .. لحظة انفجارهم قربت .. نفسى أوصلها للحكومة .. من أكتر من 30 سنة حصلت انتفاضة الحرمية .."كما أطلقت عليها السادات " اللى هى فى الاصل كانت انتفاضة الخبز ..
عايزة اقولهم انتظروها قريبااااا ..
هناك 8 تعليقات:
فعلا والله مقاله جميلة وبتصور فعلا اللى بيحصل وربنا عالمفترى وربنا مع الغلابه ومفيش كلمه اقدر اقولها الا حسبنا الله ونعم الوكيل
إحنا لو اتكلمنا عالعيش هنقعد للصبح
وعالعموم أنا هحاول أحصر كلامي فى عنصرين
أولا:الدقيق أصحاب المخابز بيسرقوه وبتوع التموين -اللى المفروض إنهم الناس (الأمناء)اللي بيشرفوا عليهم- بيمروا علشان ياخدوا ب4أو5 جنيه عيش ببلاش ويمشوا!!!!!!!!!!!!!!
ثانيا:معرفش إيه الهدف من إن دايما العيش بيطلعلنا فيه حشرات أو أحجار أو ألوان غريبة المهم إن كل فرد بعد ما بياكل الرغيف بيحمد ربنا مليون مرة لمجرد إن هوه كل الرغيف لآخره من غير ما يستفرغ!!!!!!!!!!!!
حسبى الله ونعم الوكيل
انا اخر بوست عندى عن الموضوع دا برده
غير معروف..
شكرا على المرور ونورت المدونة..
بنت مصر
بالنسبة لأولا فأزمة العيش فأقل سبب ليها هو الرشاوى .. هى سبب بس هى موجودة من زمان من قبل الازمة الاخيرة ديه ..
السبب الاساسى فى الازمة المرة ديه هى هى غلو أسعار الارز والمكرونة ..واللى اجبرت ناس كتير مكنوش بيعتمدوا على العيش انهم يشتروا وفى نفس الوقت ارتفاع سعر القمح واللى أدى ان الناس اللى كانت بتعمل عيش فى بيتها اتجهت كمان لانها تشترى جاهز من الفرن لانه مفيش دقيق متوفر..
بالنسبة لثانيا..كل حاجة فى بلدنا بايظة ..مش العيش بس..:s
حسام يحي..
موضوع مؤثر ومش اول حالة انتحار ولا هتكون الاخيرة فى بلدنا ..
أولا وقبل اى كلام شيلوا من دماغكم وفكركم ومناقشتكم حكايه الثوره سواء ثوره حراميه او جعانين او شحاتيين
لا
.. دا كان زمان
قرأت لموضوع بيتكلم عن ظهرو قنابل المولوتوف فى ايدى المصريين اثناء العراك على الخبز وان القنابل بدأت تظهر تانى بعد اختفائها تقريبا من ايام الاحتلال
نادر الخطاب
وكان ردى على الموضوع ان الشعب فعلا بدأ ينفجر ولكن ينفجر فى نفسه
الى بيحصل كالأتىد
النظام فى مصر غارق فى الفساد ورجال النظام طالعين واكليين ونازليين واكليين
يقوم الشعب الى مش لاقى ياكل يمسك فى خناق بعضه
ويموت بعضه
محدش عاوز يبص للسبب الرئيسى
يعنى الشعب بيعمل فتوه على نفسه
يأما واحد يعمل عركه ويموت واحد زيه تعبان ومش لاقى ياكل
يأما يروح يشرب سم فران لانه فعلا بقى زى الفار مش لاقى ياكل
للأسف
احنا لازلنا فى انتظار من يوجه المصريين التوجيه الامثل والصحيح والسلمى لمن هو السبب الرئيسى فى معاناته امام المخابز
نادر الخطاب..
احنا مش فى انتظار من يوجه الشعب فقط..لا احنا محتاجين حد يفهمه ويفوقه..
الناس برغم كل اللى بيحصلها بس مفقتش .. المشكلة لما تفوق هتتحول فعلا لثورة .. لان هيكون وقت الحلول العقلانية انتهى .. بفرض لو حصل دلوقتى انتخابات ..كل الناس اللى بتشتكى ولااااااااا هيشركوا .. يعنى يشتكوا آه ..يشاركوا فى التغيير لا..مش عارفة المشكلة فى الشعب ولا فى التوعية اللى المفروض يقدمها المثقفين ولا فى مين..!!
3ade ho da el 3ade
la ' vie cie la vie
suis egyptian en ne' ba egyptian
mesh faaaaaaaaaaaaaaaar2a
إرسال تعليق